Jun 5, 2007

تفتكر بجد المرة دى؟؟

قرب قرب
قرب جرب
فرصة عظيمة لكل مجرب .. طعم الحزن
بص ودقق
حقق
صورة شاب وحيد ومبلم .. بس معلم
لو يتكلم .. لو يتبسم .. تلقى البحر ثار واتجن
بس بفن
طب قرب أكتر .. لامس جلده وحاول تعرف
ريحة جلده ؟ والا دى ريحة أرض ندية
من شتوية ؟
حلمه الأخضر مشدود وتره
طب مين بتره؟
مين بيشخبط على كراسته ويقول فن؟
طيب حاول أكتر واكتر
قرب حقق .. دقق .. فكر
صورة شابة .. بس الفكرة انها شابة
ولسة يادوب بضفاير سمر
كل ما تكبر .. تقصر أكتر ضفايرها وقالقها الأمر
بصت من شباكها الأخضر
شافت عيد وسنين بتمر
يكفى أقولك انها لسة بتنام عينها ساعة الفجر
يكفى أقولك أنه مصدق أنه هايوصل أخر الأمر
طب قرب أكتر
وكفاية وقوف فى طابور المر
قرب قرب
فرصة عظيمة .. لكل مجرب
طعم الحزن
كل سنة وانتى طيبة

18 comments:

Anonymous said...

:))
كل سنة .. و انتى مالية الكون دوشة و غنا .. فى جلبى انا

يا بنت منى
;)

زحل الفلكي said...

كل سنه وانتي طيبة يا يارا
وعقبال 1000 سنه

Anonymous said...

كل سنه وانتى طيبه

Anonymous said...

كل سنة وانتى يارا
وحشتى اسكندرية أكتر ما هى وحشاكى
تعالى بقة

Carol said...

كل سنه و أنت طيبه
:)
الكلام حلو قوي قوي قوي :)

Unknown said...

الله ينكد عليكي

يا بنتى هو انتي متعرفيش تفرحي

حتى ف عيد ميلادك

طب افرحي مرة وهديكي بونص


الله يخرب بيت اللى كان السبب

الا متعرفيش يا يارا احنا ايه اللى عمل فينا كده

كل سنة وانتى يارا

والسنة الجاية تتعلمى تفرحي

ع اساس مرة من نفسك ... يعنى

حدوته مصرية said...

كل سنة وانتى طيبة يا يارا وبعيد عن الحزن و تكونى فى فرح

بس كلام و بوست جميل كالعادة

تحياتى

3aziz 3eni said...

افهم من كده ان ده عيد ميلادك؟
كل سنه وانت طيبه
بس ليه كده؟
بجد حزن وتعب هى ناقصه...صدقيني انت لسه ياما الواحد هايشوف
مافيش داعى من اولها كده صدمه
صحيح الواحد لما بيفكر يلاقى ان عمره بيتسرق منه لكن تفتكرى ممكن يرجعه تانى؟
فرفشى الدنيا بتخلص الحقيلك فرحه حتى ولو من الشفايف
عقبال ما تفرحى فرحه كبيره ما حدش يقدر ياخدها منك

مصطفى حسان said...

أنا كل اللي عاجبني في المدونة الإسم

عشان فكرتيني بأغنية لفيروز أكيد انتي عارفاها


يارا الـ جدايلها شقر
ال فيهن بيتمرجح عمر
وكل نجمه تبوح باسرارا
يارا
يارا الـ غفي ع زندها خيها الصغير
وضلت تغني والدنيا حدها تطير
والرياح تدوزن وتارا
يارا


وكده يعني ... البوست رائع

تحياتي

بلال حســــنى said...
This comment has been removed by the author.
Emad Karim said...

كل ما اقرب الاقي عيني عايزه تقرب اكتر
واكتر

ابص واستفهم هو دا كلام
احلام
ولا شخبطة حد عيان

عيني تدمع من حروف مكتوبة بدم الحزن

راسي تصدع من حضنى لشاشة الكمبيوتر

واقول لو يوم
يوم واحد
تفرح يارا
وتغير لون الكتابه
للون ابيض

حرام عليكي ضيعتى شوية النظر اللى باقيين وفتافيت الزاكرة وانا بحاول افتكر

هو اانا علشان بحب اقرالك تعملى فيي كدا

روحي يا يارا عليكي الفرح بالتلاته

وكل لحظة وانت مرسومة بضحكة وردي

غادة الكاميليا said...

كل سنه وانتى توته يابنت
افرحى حبه تيجى نعمل مظاهرة للفرح علشان نفرح كلنا والله نفسي أفرح تعالي تعالي هنعمل المظاهرة على حسك
كل سنه وانتى أجمل

طاهر خشاب / Taher Khachab said...

كل عام وأنت بخير
الفرصة العظيمة إني عرفت بوجود زاويتك وإنشـاء الله قبل عيد ميلادك الجاي بهنّيكي بحلول السـعادة في ديارك وفي دياري. طيّب منجرّب!!! ولو لمسـة ريح تفرفح بقلبك

Bassma said...

يارا الجدايلها شقر
كل سنة و انتي جميلة و بتحسي ..بس قادرة تفرحي

Amira Hassan said...

حلوة اوي بجد

Anonymous said...

يكفي ااقولك اني مصدق اني هوصل اخر الامر

Anonymous said...

بحبك ياااااا يااااااا

Anonymous said...

ياريت توصلك ريالتي ياااا يااارااا ياااا حضن الحضن