May 12, 2007

تفتكر؟؟


لما أقولك .. تفتكر؟
يبقى قصدى على بكرة
تفتكر هاطمن ؟؟
تفتكر هاتجنن؟؟
والا يمكن يثبتلى زمانى عكسه
ويحضنى
تفتكر ؟؟
الحزن بينسينا عدد السنين اللى فاتت
ننسى نفكر فى اللى جاى
ونتحسر على سنين ماعشنهاش
ونوصل لنقطة نهاية
انا مش هنا .. انا ماكنتش
بس تعرف
أوقات باحس انى أقدر أفتح شباكى
واملى صدرى غنا البحر
وان حسيت انى شتيت
هاعرف مكانى
تفتكر؟؟
هنلاقى عمر نرجع .. ونقول لأ ؟؟
هنلاقى مكان .. يجمع؟
لما أٌقولك .. تفتكر؟
يبقى قصدى على حلمك
موجود اهه تحت جلدى
ضعيف وخايف
يمكن يبان تحت الشمعة
ويمكن وقع فى نص الطريق ..
بيتفتفت ستين حتة .. مع أول شتا
نفسى أموت وانا واقفة .. زى الشجر
احنا مش دود
ماتزحفش على بطنك لو هاتموت
تعالى النهارده من غير تفسير
عاوزة أحضنك بجد
عاوزة أحبك بجد
ملعون أى سور
ملعون أى حد
لما أقولك .. تفتكر؟؟
يبقى قصدى على الوحده
وأنا فى حضنك هاحضنها
والا حضنك هيطيب؟
تفتكر؟؟
بكرة هاشوفها جاية عليا
بضفاير سود
وعنيها بتشق الضلمة
والا هاتوحد تانى ؟
لما أٌقولك .. تفتكر؟
يبقى أقصدنى
وشى كترت تجاعيده والا لسة الورد ماماتش
واللحظة ما جاتش
لسة بكر أنا؟؟
لما أٌقولك تفتكرى ؟
يبقى أقصد قلبك الخسران
العطشان
يا صاحبة الطريق
هاتقدرى لنفسك تبتسمى ؟
وبالليل تحضنى زكرياتك .. وترضى؟
تفتكرى ؟
انتى بتستهبلى بقة

12 comments:

Anonymous said...

انا افتكر
لكن انت اللى فعلا بتستهبلى بقا
:p

Unknown said...

لما بنفرح قوي


بنخاف قوي


وبنسأل روحنا


تفتكري ...... هتدوم




ولما بنحزن قوي

بنتوجع قوي

وبنسأل روحنا برضه

تفتكري ...... الحزن هيفارق


والدنيا كده
يوم كده
ويوم كده

متنسيش احلامك

واحضنيها

اخطفيها

ومتضيعيش الوقت ف الاسئلة


بلا تفتكر .... بلا ما تفتكرش

انتى هتقرفينا
(:

Anonymous said...

لو كل اما حتفرحى حتعدى تفكرى اذا كانت حتدوم ولا لا يبقى عمرك محتفرحى .. الحياه اصلا كلها هموم يبقى مش ناقصه ان احنا نشيل هم الفرحه كمان

Anonymous said...

تفتكرى انتى ان فى نتيجة
معتقدش

حدوته مصرية said...

سبيها كده ساعات فرح و ساعات حزن من غير تفكير هيزول الحزن امتى ولا الفرح هيدوم

كلامك جميل

زحل الفلكي said...

نفسي افهم شعورك ولو مره واحده
يمكن علشان متكلمتش معاكي كتير او معرفتنا محدوده
لكني واثق اني لو اخذت وقتي
واتكلمنا
حقدر في مره افهم شعورك

على فكره صدفة سعيده اني شوفتك من يومين
واتمني تتكرر الصدف اللي زي دي بتكون لذيذة

ساعه الغروب said...

انا خلصت وهفوقلك يا حلوه
واستلقى وعدك يا قمر

جيالك اسمع كل اللى فات من غيرى

ونرجع تانى لخروجاتنا التهييسيه العلاجيه

يعنى لا فيها استهبال ولا استعباط

انا فضيت ..عارفه يعنى ايه؟

يعنى هنطلع عين بعض تانى

سلام يا يريورتى
:)


رودى

غادة الكاميليا said...

ياحبيبتى يارا كلنا بنستهبل باللى احنا فيه
ياناس ده احنا كده أتعس ناس
اه لو نبطل نفكر كتير

Anonymous said...

هوا يعني معداش عليكي ولا موقف تكتبي فيه موضوع
اكيد حصلك مواقف
متبخليش على مدونتك كده

Nour said...
This comment has been removed by the author.
Nour said...

:) صباح الفل على عيونك يا يارا

كمنجاتي said...

أنا عن نفسى بستهبل

وشكرا على حسن استماعكم
وكل عام وانتم بخير