Apr 5, 2007

...

الرابعة صباحاً ... شاى بالكراميل ؟ الاَن ... لم يغمض لها جفن منذ ثلاثة أيام .... تجلس على أرضية غرفتها الضيقة وترجع رأسها الى الوراء ، تقلب فى القنوات كعادتها أملاً فى اضفاء بعض الحياة على نهاية يومها البائس .. فيلم لستيف ماكوين يبدأ الاَن ، تعشقه منذ ان كانت تشاهد أفلامه مع أبيها .. هو أيضاً كا يشاهد أفلامه المفضله بالصدفة ، ودوماً .. فى بدايتها
لم تشهد شتاءً بهذا الجفاء .. حتى الشتاء بخيلاً .. أصبح الخريف أكثر وضوحاً
هاتفها الخلوى لم يرن منذ أسابيع .. لم يرن عن حق منذ سنين .. تنظر اليه بدهشة وتبتسم .... تقرر اغلاقه
ظهر ستيف ماكوين .. تعشق هذا المشهد عندما يشعل السيجارة ويرفع رأسه .. عين يملؤها التحدى ... تضع يدها على وجهها وتبتسم .. ترشف الشاى الذى أصبح ثليجاً .. لا شىء كامل على أى حال
أول غنوة .. ان لم يكن دوراناً فلتسميه رقصاً .. ترغب فى الرقص الان أكثر من اى وقت مضى .. وان بحثت عن الغنوة ، فلن تجدها .. ستيف ماكوين يفكر فى الهرب
الو
انا يارا
ازيك؟
بتعملى ايه؟
باقرا كتاب
انيس منصور ها؟
فيه غيره؟ وانتى؟
بادور على غنوة بنت حرام ومش لاقياها
ومش هتلاقيها
اه مانا عارفة .. نتقابل بكرة؟
بالليل بقة
باى
باخر الليل كونك انت بقيت .. بتحبنى بتقول او يمكن .. يمكن ما بتحبنى
تلتقط هاتفها وتنظر الى الأسماء .. أرقام محتجزة داخل هاتف معلق بين الماضى والمستقبل .. ابتسامة هذا الرجل رائعة .. ستيف ماكوين يحاول الهرب

الو
انا يارا
ازيك؟
بتعمل ايه؟
بحاول انام .. عاوزة ايه؟
عندك شريط فيروز فى بيت الدين ؟
اه .. اى غنوة ؟
اول غنوة .. سمعنى المزيكا
اصلى لسة هاقوم افتح الجهاز .. طب ما نتقابل بكرة
اوكيه .. باى

الرابعة والنصف .. كوب اخر ، ساخن ونكهته أقوى ، تملؤها بقايا عطر قديم .. يقطع داخلها إرباً ... الموسيقى هى الشتاء الوحيد الذى لا يبخل أبداً .. تقترب الكاميرا من وجه ستيف ماكوين وتلمع عيناه السماء ..
ما بعرف كيف بتحب وما بتعرف اذا عم بتحب
ما بعرف كيف بتحس وما بتعرف شو عم بتحس
ستيف ماكوين يفشل فى الهرب

الو
انا يارا
ازيك؟
بتعملى ايه؟
دلوقتى ؟ بحاول اعرف ليه بتتصلى بيا الساعة 5 الفجر يابنت القلقانة
عندك شريط فيروز فى بيت الدين ؟
اه .. فى العربية
طب انزلى هاتيه .. اول غنوة .. سمعينى المزيكا
اه اوى .. لحظة اقول لابويا انى هانزل اوصل الراجل اللى كان معايا .. انتى هبلة يابت ، انتى فكرانى فى كباريه
خلاص
يبقى عندك بكرة
اوكيه .. باى
حبنى بس .. حبنى .. حبنى بس .. حبنى
يلعب بالكرة كرجل حر ... ومازال يفكر فى الهرب .. وعيناه يملؤها التحدى
اخر كوب .. ومازالت النكهه تبعثر ما تبقى منها .. حقيبتها بنية اللون .. جميع حقائبها بنية اللون .. الخامسة صباحاً ، لن تضطر لمقاومة النوم .. تنظر الى هاتفها وتبتسم ..
لن تعثر على الغنوة مهما حاولت .. مازالت تبحث .. فيلماً لكيفين سبايسى يبدأ الاَن

8 comments:

Amr Ahmed said...

اول زيارة واول تعليق

حلوة القصة

هي فعلا بتبقي مشكلة لو الوحد عاوز يمعل حاجة معينة

بس مش كده برضو
انا لو حد اتصل بيا الفجر علشان اسمعه اغنية
معلش بقي هاشوطه

هههههههههه
تحياتي

Ghada said...

حسيت بطعم كل كلمة وشميت قلقك ووجعك وإحباطك واحتياجك..

لخبطتيني يا يارا.. بديع بجد :)

حدوته مصرية said...

اسلوبك و كتاباتك تحفة
انتى كاتبة محترفة عندك ادوات كتير ما شاء الله
ومش ببالغ

Nour said...

:)جميلة زيِّك يا يارا

Mr-Biboooo said...

دخل الشتا قفل البيبا و البيوت

جعل شعاع الشمس خيط عنكبوت

حاجات كتير تموت فى ليل الشتا
و حاجات كتير بترفض تموت

عجبى

Anonymous said...

واضح انك بتحبى الافلام الكلاسيكية
انا باقرالك على فكرة من اول ما ابتديتى تكتبى عن دار مدينة نصر وكنت باحب حكاويكى جدا
متحاولى تكتبى تانى والا الحكاوى خلصت؟؟
تحياتى يايارا
واحترامى

Anonymous said...

انتى اتوحدتى تانى يابت يخرب بيت ابوكى
هو احنا ماورناش غير الشاى اللى بالكراميل ..
وماله الشاى بالقرنفل ياتحفة حياتى
وحشتينى يا بأفة عمرى
فيروووووووووووووووووووووووووووووز

Unknown said...

مش عارفة ليه حبيت البوست ده

في جنون خفي


جنون جنون

بتاع واحدة تراللي ومش ناقصها غير القميص اللي بالمقلوب وتتجر على السرايا الصفرا

كان فاضل حاجة واحدة
انك تبداي تسألي ستيف ماكوين على الغنوة