.......

خايف ألمسك .. ماقدرش أسيبك تانى

يمكن تكون أجمل كلمة سمعتها فى حياتها

.......

واحدة بتحب التدخين
حبها للراجل الوحيد فى حياتها
واللى عمره ما قابلها
صدرها بينفردله فى الضلمة
هروبه طبيعي من الأنا للشوارع
وحوارى جانبيه بعيدة عن اللمض النيون
ساعتها تبقى الذاكرة فى حالة نزيف
حست إنها لازم تلم أيامها فى كفن وتنسحب بهدوء
حست إن الموج بيسحب خطوات من نقطة ميلادها
وإن البحر
بإرادته
كان مقاسمها كل أخطاء التمنى


وعرفت إنك من البداية
عمرك ما فارقتها

فوضى

كلمات لا تنعم بالقراءة .. تكتب حرفاً ثم تقتله فى لحظات دون رحمة .. فقط يبقى هذا الصوت يتردد بداخلها فتعجز عن إيذائه .. فمن قتلها يوماً يمد لها يد العون اليوم وينتظر كلمة لا تتردد فى كتابتها .. وهى .... دون قصد .. تتمنى ..................................

صخب

تركها زوجها
كعادته كل صباح
فى هواء حميم
فوجدت عشيقاً
كانت تحدث دجاجاتها كل يوم
تمد يدها فى الهواء كساحرة
وتطعمهن ... دون هدف
فهى تجهل جدول الضرب
مثل جدتها تماماً
لكنها صديقة النور
حين تناديه يأتيها زاحفاً
فتطعمه .. نصف أشيائها
لأنها .. رحيمة بالظلام أيضاً

...

ليكن وداعنا سريعاً كإيقاع الحياه .. فلا أرغب فى سماع ترهات أخيرة .. تمحو بسطحيتها ذكريات العلاقة

البنت إللى جوة عنيها .. الشيطان بيلعب كمانجة

سألت نفسك وإنت خارج من ساعات الإنهزام
إيه تانى ممكن بعد قلبك ينكسر ؟
ردت عليك الساعات المستبدة
بعد تلاتة الصبح
وفنجان قهوة طعمه مش ولابد
وكل خيوط إمبارح محاوطاك
يعنى ..
لزوم هروبك من وطن عمره مابادلك نفس إحساس الولع
الدموع خانت مشاعرك مرتين
حسيت بضاَلة كل شىء
فجأة إنتحرت جوة نفسك وإبتديت
اَخر محاولة للهروب
إحساس دائم بشخص طيب
بيتمشى بحرص بين أشلاء جروحك
رحل .. لما عصره اليأس
منك
وقتها إتلجم لسانك بالدموع
وسألت نفسك
ليه تانى بتسلم لدايرة محالك
إحسم رجوعك بالفراق
وأسجن قهرتك بالغنا
إنضم للحن جيلك وانسجم
متضحكيش عليا
ياشمس
مش أنا
إللى كتبت فصول الرواية
ومحفظ الناس الحوار
ولا بدرت الشك جوة الأسئلة
المر علقم فى غنوتى
غصب عنى
ماهى كده
رقاصة خايبة .. نازلة هز
وفى الغنا
لا الناس فاهمة غناها .. ولا فهماه انا
كل السراب فيكي ياشمس
مش فى الليل
لما الألم يمر زى السيف
على وشوش أصحابي القدام
والشخص الطيب يرحل
قبل أوانه
يبقى ليه بنلوم الشجر
لما يطرح رحيل

باب مقفول

قبل ما أكتب فى المدونة .. كانت طريقة تعبيرى عن اللى جوايا بالرسم .. أول حاجة اتعلمتها قبل الكتابة
التدوين بالنسبة لى كان تجربة جميلة .. وفرصة انى اعرف ناس كتير عن طريق كتاباتهم وأفكارهم ومشاعرهم
ربطتنى ببعضهم صداقة ، والباقى كان عامل زى المحطات .. بس قلبى برضة كان حاسس بشوية ونس
مش هاعرف اقول اكتر من كده .. بس حقيقى تجربة فريده بالنسبة لى ، اتمنى تكون تجربتى جوة دار مدينة نصر أفادت بعضكم .. واتمنى اكون ضيفة خفيفة على مدوناتكم لما توحشنى وأطل عليها
فأنا بعد إذنكم .. هاقفل الباب